Samstarvsfelagar í AquaVitae í Florianópolis, Brasil til fjórða árliga fundin í verkætlanini. Myndir: CETMAR, F. do Nascimento & Fiskaaling
AquaVitae verkætlanin hevði herfyri sín fjórða árliga fund í býnum Florianópolis í Brasil. 68 fólk vóru við úr 13 ymiskum londum. Tey umboðaðu vinnuligar fyritøkur og granskingarstovnar, ið eru við í verkætlanini. Frá Fiskaaling luttóku Gunnvør á Norði og Sandra Ljósá Østerø. Unn Laksá, stjóri í Sjókovanum, var eisini við á fundinum.
AquaVitae er ein EU Horizon 2020 verkætlan, har ið endamálið er at økja um framleiðsluna av føði úr Atlantshavinum við at økja um burðardygga framleiðslu av djórum og plantum, sum eru niðarliga í føðiketuni. Fimm virðisketur eru við í verkætlanini; tari, samaling, ryggleys djór, skeljadjór og fiskur. Fundurin snúði seg um hvat er gjørt higartil í verkætlanini, og hvat er eftir at gera.
Eitt av úrslitunum frá verkætlanini, ið varð víst fram á fundinum, er eitt ókeypis opið kandidat skeið á netinum, ið snýr burðardygga aling av djórum og plantum, sum eru niðarliga í føðiketuni. Skeiðið, ið tekur umleið 10 vikur, er klárt at taka.
Skipað varð fyri tveimum útferðum á túrinum, tann fyrra var ein vitjan á granskingarstøðini hjá universitetinum Universidade Federal de Santa Catarina (UFSC). Her sóu tey vitjandi aling av skeljum, rækjum og fiskum. Serliga áhugavert var at síggja eina roynd, ið tey gjørdu við samaling av fiski, rækjum og tara á landi. Seinna útferðin var til eitt ostru alibrúk. Florianópolis veitir 90% av ostru larvunum til ostru framleiðsluna í Brasil.
Tríggjar føroyskar fyritøkur luttaka í verkætlanini, Ocean Rainforest, Sjókovin og Fiskaaling umframt at stórur partur av arbeiðinum sum Fiskaaling hevur gjørt er í samstarvi við Hiddenfjord. AquaVitae er ein 4 ára long verkætlan, ið endar seinni í ár. Ein endafundur verður í Írlandi um mánaðarskifti novembur/desembur.
Í sambandi við AquaVitae verkætlanina hevur Fiskaaling:
- Gjørt eitt yvirlit yvir hvørji øki í Føroyum eru hóskandi til taraaling við ávísari aliútgerð út frá streymi, aldu og dýpi. Arbeiði er gjørt í samstarvi við Ocean Rainforest.
- Kanna hvussu samaling av laksi og kræklingi tekur mest møgulig tøðevni úr umhvørvinum, har ið hugt var eftir hvussu kræklingur beinleiðis og óbeinleiðis kann minka um umhvørvisdálking frá laksaaling.
- Havt ein bachelor næming frá Hannover Universiteti í Týsklandi, sum hevur gjørt kanningararbeiði í Føroyum. Hon kannaði vøksturin av tara tætt við eitt laksaalibrúk, í mun til burtur frá.
Meira kunning:
Kunning um AquaVitae (fiskaaling.fo)
Leinkja til kandidatskeiðið: MOOC on Sustainable Aquaculture for Low Trophic Species
Kontaktpersónur: Gunnvør á Norði
Myndir frá vitjanini á granskingarstøðini hjá universitetinum Universidade Federal de Santa Catarina (UFSC). Eftir vitjanini sluppu tey vitjandi at royna skeljar, rækjur og fisk, ið vóru ald á granskingarstøðini.
Eitt spæl er ment í sambandi við verkætlanina. Hetta er eitt borðspæl, ið eggjar til kjak og læring um aling av av djórum og plantum, sum eru niðarliga í føðiketuni.
